Sikwate

Pagkalami gayud ini imnon
Pangwala sa panuhot sa kabuntagon
Gatunaw pa ba ka'g tableya
sama sa akong apuhan sa una?
O mokalos na lang ba ka
sa Milo o Ovaltine nga gikan sa lata?

Diyut-diyut mahinumduman
Daw saging luto o sabaw sa inun-unan.
Bisan karong ni-a na sa laing nasud
Di gayud malimtan ang pag-amuma nga tinuod.
Di gayud matandi, wa gayuy sama,
Sama sa sikwate nga hastang espisoha.

Apan tungod ni-a man sa layo
Mapanganduyong paghandum na la'y ako,
Ug "Cacao fort sucré" gikan sa vendo,
Tag baynti-sinko sentimo euro ang baso.
Mao ni karon ang akong sikwate
Kay wa man jud ko nahilig sa kape.

Mga Pagtulon-an Sa Kinabuhi

(Lessons from Life)

Ang batang ginabiay-biay, mahimong mahadlokon.
(A child who lives with ridicule, learns to be timid.)

Ang batang ginasaway, makat-on sa pagtunglo.
(A child who lives with criticism, learns to condemn.)

Ang batang wa gisaligan, mahimong tikasan.
(A child who lives with distrust, learns to be deceitful.)

Ang batang gina-away, makat-on sa pagsukol.
(A child who lives with antagonism, learns to be hostile.)

Ang batang ginapangga, makat-on sa paghigugma.
(A child who lives with affection, learns to love.)

Ang batang ginadasig, makat-on sa pagtu-o.
(A child who lives with encouragement, learns confidence.)

Ang batang nagdako sa kamatu-oran, makat-on sa katarong.
(A child who lives with truth, learns justice.)

Ang batang ginadayeg, makat-on sa pagtamud.
(A child who lives with praise, learns to appreciate.)

Ang batang nabuhi sa panag-ambit, ma-manggihuna-huna-on.
(A child who lives with sharing, learns to be considerate.)

Ang batang nagdako sa kahibalo, makat-on sa kina-adman.
(A child who lives with knowledge, learns wisdom.)

Ang batang nabuhi sa pagpa-ilob, mahimong madinawaton.
(A child who lives with patience, learns to be tolerant.)

Ang batang nagdako sa kalipay, makakaplag sa gugma ug katahum.
(A child who lives with happiness, will find love and beauty.)

-- Gihubad sa Binisaya ni (Cebuano translation by):
Teryoks (http://handum.blogspot.com)

Tuplok

Tuplok, tuplok,
buntag, udto, hapon.
Tuplok, tuplok, tuplok
hangtud sa kagabhi-on.

Ang keyboard mo-uplok
apan daw di jud maluta;
Ug wa jud nisibat
ang mouse nga dili ilaga.

Bug-at nga kamot,
Kubalan nga pulsohan;
Hapdos na'ng mata,
Busdik ang tiyan.

Apan tuplok ang kalipay,
Mao pu'y panginabuhi.
Busa tuplok gikan s' buntag,
Tuplok hangtud s' gabi-i.

Bayani

Nagpahilayo, ninglangyaw.
Nangita sa pag-usbaw.
Apan wa gyud gidahum
ang gahulat nga kamingaw...

Matag adlaw.

Ang palad sa nanimpalad
mao ang paghangad,
pagpugong sa dugang pang
mga luhang mahuwad...

Matag adlaw.

Bayani? Intawon
ayaw'g yama-yama-i.
Haw-ang nga pasidungog,
makahupay ba kini...

Matag gabi-i?

-- Teryoks (http://handum.blogspot.com)

Maayong Adlaw!

Usa ka buntag,
samtang ako nagsakay sa bus
paingon sa opisina,
daw gihapuhap
ang akong huna-huna
sa lunsay nga kalinaw.

Ug sa kalit lang, natagik
daw buwa nga lumalabay
kining kalipay
nga di mahulagway,
ni mahandum,
gawas lamang sa dilang
binisaya.

-- Teryoks (http://handum.blogspot.com)